Azərbaycan Milli Elmlər Akademiyası

Qazaxıstanın paytaxtı Astana şəhərində "Burabay forum: beynəlxalq əməkdaşlıq" mövzusunda gənc alimlərin beynəlxalq forumu keçirilir.

3 gün davam edəcək forum Qazaxıstan Respublikasının Birinci Prezidenti Fondu və həmin fondun Elmi Şurasının təşkilatçılığı ilə baş tutur.

Tədbirdə Qazaxıstanın dövlət orqanlarının rəsmiləri, ali təhsil müəssisələrinin rektorları, MDB respublikalarının Gənc Alimlər şuralarının sədrləri və gənc alimlərdən ibarət 8 ölkənin 100-dən çox nümayəndəsi iştirak edir.

Beynəlxalq forumda ölkəmizi AMEA-nın Gənc Alim və Mütəxəssislər Şurasının sədri, f-r.ü.f.d., dosent Famin Salmanov, Rəyasət Heyəti aparatının Elm və təhsil idarəsinin rəis müavini, t.ü.f.d., dosent Hüseyn Hüseynov və həmin idarənin Elmi-analitik şöbənin rəisi Fail Kazımov təmsil edirlər.

Astana Nazarbayev Mərkəzində öz işinə başlayan tədbirin ilk günündə iştirakçılar sərgi salonunda nümayiş olunan gənc alimlərin elmi işləri ilə tanış olublar.

Açılış mərasimində Qazaxıstan Respublikasının Birinci Prezidenti Fondunun icraçı direktoru Kanat Cumbaev çıxış edərək forumun əsas məqsədinin Qazaxıstanla MDB respublikalarının elm və təhsil müəssisələri arasında əlaqələrin genişləndirilməsi, iştirakçı ölkələrin alimlərinin elmi-nəzəri və praktiki tədqiqatların ümumiləşdirilməsi və sistemləşdirilməsi istiqamətində fikir mübadiləsinin aparılması və perspektiv planların müəyyənləşdirilməsi olduğunu qeyd edib. Bildirib ki, tədbir elm mütəxəssisləri üçün multidissiplinar əməkdaşlıq platformasına, həmçinin nüfuzlu alimlərin bir araya gətirilməsinə imkan verəcək.

Forumun plenar iclasında AMEA Gənc Alim və Mütəxəssislər Şurasının sədri Famin Salmanov "Azərbaycanda elmi gəncliyin inkişaf strategiyası və şuranın fəaliyyəti" mövzusunda məruzə ilə çıxış edib. O, çıxışında ölkəmizdə elm sahəsində son illərdə aparılan islahatlar, Azərbaycan elminin dünya elminə inteqrasiyası, elm-təhsil-innovasiya vəhdətinin yaradılması, gənc alimlərimizin beynəlxalq əməkdaşlıq əlaqələrinin inkişaf etdirilməsi və bu istiqamətdə rəhbərlik etdiyi şuranın gördüyü işlər, eləcə də nəzərdə tutulan fəaliyyət planı haqqında məlumat verib.

Tədbir çərçivəsində, həmçinin "Təhsil və elm inteqrasiyası: təcrübə və perspektivlər" və "MDB ölkələrində qlobal elmi və texnoloji problemlərin həlli üçün gənclərin rolu" mövzularında panel müzakirələr aparılıb.

Qeyd edək ki, forum öz işini avqustun 11-də başa vuracaq.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.