www.science.az
10.04.2018 08:20

Qubada “Azərbaycanlıların soyqırımı - 100 il” mövzusunda elmi-praktik konfrans keçirilib

AMEA-nın Gənc Alim və Mütəxəssislər Şurası (GAMŞ) ilə Fövqəladə Hallar Nazirliyi işçilərinin Həmkarlar İttifaqının üzvləri 31 mart soyqırımının 100-cü ildönümü münasibətilə Quba Soyqırımı Memorial Kompleksini ziyarət ediblər.

Ziyarətçilər əvvəlcə erməni vəhşiliyinin əyani sübutu olan kütləvi məzarlığın üzərinə qərənfillər qoyublar.

Sonra Quba Soyqırımı Memorial Kompleksinin zalında Fövqəladə Hallar Nazirliyi işçilərinin Həmkarlar İttifaqının təşkilatçılığı, respublikanın gənc alim və tədqiqatçılarının iştirakı ilə “Azərbaycanlıların soyqırımı - 100 il” mövzusunda elmi-praktik konfrans baş tutub.

Soyqırım qurbanlarının və Azərbaycanın azadlığı və ərazi bütövlüyü uğrunda canlarını qurban vermiş şəhidlərin əziz xatirəsi ehtiramla yad olunduqdan sonra Həmkarlar İttifaqının sədri Mehman İsmayılov çıxış edərək ermənilərin tarix boyu azərbaycanlılara qarşı törətdikləri vəhşiliklərə geniş nəzər salıb. M.İsmayılov soyqırım qurbanlarının xatirəsinin əbədiləşdirilməsi və xalqın milli yaddaşının bərpası, tarixi həqiqətlərin aşkarlanması sahəsində ümummilli lider Heydər Əliyevin və Prezident İlham Əliyevin həyata keçirdiyi işlər barədə danışıb.

Konfransda GAMŞ-ın sədri, fizika üzrə fəlsəfə doktoru, dosent Famin Salmanov çıxış edərək 31 mart soyqırımının XX əsrdə baş verən ən dəhşətli faciələrdən biri olduğunu, Quba məzarlığının ermənilərin soydaşlarımıza qarşı törətdikləri vəhşiliklərin əyani sübutu olduğunu bildirib.

Sonra Fövqəladə Hallar Nazirliyi Aparatı Katibliyinin rəis müavini Ziya Hacılı “Azərbaycan xalqının milli yaddaşının qorunması və tarixi gerçəkliyin bərpasında 1918-ci il soyqırımı hadisələrinin tarixi-siyasi əhəmiyyətinin təhlili” mövzusunda çıxış edib, soyqırım qurbanlarının xatirəsinin əbədiləşdirilməsinin Azərbaycan xalqının qan yaddaşının bərpa olunması baxımından əhəmiyyətli rol oynadığını söyləyib.

Konfransda, həmçinin AMEA-nın Elm Tarixi İnstitutunun İctimaiyyətlə əlaqələr şöbəsinin müdiri Cavidan Qasımlı, Tarix İnstitutunun aparıcı elmi işçisi, tarix üzrə fəlsəfə doktoru Lamiyə Qafarzadə, Ədəbiyyat İnstitutunun Ədəbi tənqid şöbəsinin doktorantı Gülnar Qasımlı və digərləri çıxış edərək 31 mart hadisələrinin miqyası və nəticələri, o cümlədən XX əsrdə ermənilərin törətdikləri digər vandalizmlər haqqında danışıblar.

Sonda qonaqlar kompleksin ərazisində soyqırıma dair sənədli eksponatlarla tanış olublar.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.