www.science.az
18.12.2017 15:34

“Science City” yaşayış kompleksində qazıntı işlərinə start verilib

Məlum olduğu kimi, Abşeron rayon Saray qəsəbəsində yerləşən “Alimlər şəhərciyi”ndə AMEA əməkdaşları üçün kooperativ binanın tikilməsi nəzərdə tutulur. Bu məqsədlə akademiyaya məxsus torpaq sahəsində inşa ediləcək tikinti kompleksində layihələndirilmə işləri aparılmışdır. Eyni zamanda, mənzillərin AMEA əməkdaşlarına sərfəli kredit şərtləri ilə təklif edilməsi məqsədilə müvafiq tədbirlərin görülməsi nəzərdə tutulmuşdur.

Bu gün AMEA-nın İşlər İdarəsinin müdiri, siyasi elmlər doktoru Fətəli Abdullayev, layihənin rəhbəri Elçin OrucovAzad Həmkarlar İttifaqının (AHİ) sədri, hüquq üzrə elmlər doktoru, professor Habil Qurbanov, elmi müəssisə və təşkilatların ümumi işlər üzrə direktor müavinləri, həmkarlar təşkilatlarının sədrləri və gənc alimlərin iştirakı ilə Saray qəsəbəsində alimlər üçün nəzərdə tutulan binanın ərazisində qazıntı işlərinə start verilib. 

Öncə F.Abdullayev çıxış edərək son illər akademiya əməkdaşlarının sosial vəziyyətlərinin yaxşılaşdırılması istiqamətində kompleks tədbirlərin həyata keçirildiyini bildirib. AMEA tarixində ilk dəfə olaraq tikiləcək yaşayış kompleksinin ən uğurlu layihələrdən biri olduğunu vurğulayıb.

İşlər İdarəsinin müdiri yaxın günlərdə Saray qəsəbəsində AMEA prezidenti, akademik Akif Əlizadənin iştirakı ilə təməlqoyma mərasiminin keçiriləcəyini də diqqətə çatdırıb. O, akademiya əməkdaşlarının sosial problemlərinin həllinin hər zaman diqqət mərkəzində saxlanılacağını deyib. Qeyd edib ki, sosial-məişət və digər problemlərin həlli istiqamətində nəzərdə tutulan növbəti tədbirlərdən biri də AMEA-nın poliklinikasının açılmasıdır.

Sonra E.Orucov rəhbəri olduğu layihə barədə ətraflı məlumat verib. Bildirib ki, 7 hektar sahədə ilkin olaraq 2, ümumulikdə isə 18 blokun tikilməsi nəzərdə tutulur.

“AMEA əməkdaşlarının mənzil şəraitinin yaxşılaşdırılması məqsədilə tikiləcək “Science City” yaşayış kompleksi ekoloji təmiz havası olan ərazidə yerləşir”, – deyə bildirən layihə rəhbəri kompleksin həyəti və ətrafında böyük parkların salınacağını da vurğulayıb. Qeyd edib ki, 1,2,3 otaqlı mənzillərin müasir dizaynda və yüksək keyfiyyətlə tikilməsi planlaşdırılır.

Sonra AHİ-nin sədri H.Qurbanov çıxış edərək bu günün AMEA tarixində əlamətdar günlərdən biri olduğunu deyib, mənzilin tikintisinə cəlb olunan hər bir mütəxəssisə uğurlar arzulayıb. O, akademiya əməkdaşlarının yeni mənzillərin tikintisi və kredit şərtləri ilə əlaqədar olaraq maariflədirilməsinin vacibliyini vurğulayıb.

AHİ-nin sədri yaşayış kompleksində məktəb, uşaq bağçası, ictimai iaşə və sosial obyektlərin də inşasının nəzərdə tutulduğunu qeyd edib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.