Azərbaycan Milli Elmlər Akademiyası

Azərbaycanın ilk veb saytı (1995)

ANA SƏHİFƏ  >>  XƏBƏRLƏR  >>  KONFRANSLAR, İCLASLAR

AMEA-da Cənubi Qafqazda alman məskənlərinin tarixinə həsr olunan tədbir keçirilib
24.11.2017 15:00
  • A-
  • A
  • A+

AMEA-da Cənubi Qafqazda alman məskənlərinin tarixinə həsr olunan tədbir keçirilib

AMEA-nın Naxçıvan Bölməsində "Cənubi Qafqaz regionunda alman məskənlərinin salınması" tarixinə həsr olunan tədbir keçirilib.

Tədbirdə bölmənin sədri, akademik İsmayıl Hacıyev çıxış edərək “Cənubi Qafqaz regionunda alman məskənlərinin salınmasının 200 illiyi haqqında” Prezident İlham Əliyevin 30 avqust 2016-cı il tarixli Sərəncamını xatırladıb. Qeyd edib ki, Azərbaycanda yüzillər boyu bərqərar olmuş tolerantlıq mühiti XIX əsrin əvvəllərində buraya köçürülən alman mühacirlərin yerli əhali ilə qısa müddətdə dərin ünsiyyət qurması üçün əlverişli zəmin yaradıb. İsmayıl Hacıyev almanların yaşayış məskəni olmuş Yelenendorfda (indiki Göygöl) Azərbaycan Dövlət İqtisad Universitetinin professoru Abbas Seyidov tərəfindən tədqiqatların aparıldığını söyləyib. İ.Hacıyev aparılan araşdırmalarla bağlı 2007-ci ildə “Yelenendorf-Yeleneno-Xanlar” adlı dəyərli elmi əsərin ortaya qoyulduğunu bildirib.

Sonra Abbas Seyidov çıxış edərək almanların Qafqaza yerləşmələrinin tarixi və mədəniyyətləri ilə bağlı məlumat verib. O, almanların ilk köçünün 1817-ci ildə olduğunu və 122 il Azərbaycanda məskunlaşaraq, yerli əhali ilə dinc şəraitdə yaşadıqlarını söyləyib. Alim sovet rəhbərliyindəki A.Mikoyanın vasitəsi ilə ermənilərin Göygöl və Şəmkirdən Sibirə sürgün olunan almanların evlərinə köçürüldüyünü, yaşayış məntəqələrinin zəbt edildiyini deyib. A.Seyidov bu ərazilərdə aparılan araşdırmalar zamanı alman qəbir daşlarının dəyişdirilərək ermənilərə məxsus olması kimi saxtakarlığa yol verildiyini bildirib.

Daha sonra alim bölmə əməkdaşlarının suallarını cavablandırıb.

Sonda professorun tədqiqatlarının nəticəsini əks etdirən video nümayiş olunub.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.

  • Paylaş: