www.science.az
25.10.2017 12:51

AMEA-da “Bibliya tarixi” və “Pravoslav Katixizisi” kitablarının təqdimatı olub

AMEA-nın Əsas binasında Arximandrit Venediktin “Bibliya tarixi” və İvan Qluxovun “Pravoslav Katixizisi” kitablarının təqdimatı keçirilib.

Tədbir AMEA-nın Dilçilik İnstitutu, Azərbaycan Respublikasının Dini Qurumlarla İş üzrə Dövlət Komitəsi və Rus Pravoslav Kilsəsinin Bakı və Azərbaycan Yeparxiyasının təşkilatçılığı ilə baş tutub.

Nəşrlər Dilçilik İnstitutunun Sosio­linqvistika və dil siyasəti şöbəsinin müdiri, fil.ü.e.d., professor Mayıl Əsgərov tərəfindən Azərbaycan dilinə tərcümə edilib, Rusiyanın Sankt-Peterburq şəhərində fəaliyyət göstərən “İqumen Taisinin Xatirəsi Cəmiyyəti” İctimai Birliyinin dəstəyi ilə çap olunub.

Təqdimat mərasimində Rus Pravoslav Kilsəsinin Bakı və Azərbaycan Yeparxiya­sının arxiyepiskopu Aleksandr İşein çıxış edərək Azərbaycanın tolerant və multikultural ölkə olduğunu bildirib. O, sözügedən nəşrlərin Azərbaycan dilinə tərcüməsinin ölkəmizdə xristianlığa verilən dəyər olduğunu vurğulayıb.

Sonra çıxış edən Dini Qurumlarla İş üzrə Dövlət Komitəsinin sədri Mübariz Qurbanlı müxtəlif sivilizasiyaların mərkəzində yerləşən Azərbaycanda zərdüştilik və xristianlığın hakim olduğu dövrlərdə tikilən maddi-mədəniyyət nümunələrinin qorunub saxlandığını diqqətə çatdırıb.

Bu gün ölkəmizdə müxtəlif dinlərin nümayəndələrinin sərbəst şəkildə öz ibadətlərini etdiyini deyən M.Qurbanlı dövlət tərəfindən icmalara maddi yardımların göstərildiyini, kilsə və sinaqoqların restavrasiya olunduğunu bildirib. Komitə sədri təqdimatı keçirilən nəşrlərin Azərbaycan xalqının xristianlıqla bağlı dolğun informasiya almasına töhfə verəcəyini söyləyib.

Tədbirdə Dilçilik İnstitutunun direktoru, akademik Möhsün Nağısoylu çıxış edərək ölkəmizdə müxtəlif dinlərin və xalqların nümayəndələrinin tarixən sülh şəraitində yaşadığını vurğulayıb. Azərbaycan Respublikasının Prezidenti tərəfindən 2016-cı ilin ölkəmizdə “Multikulturalizm İli” və 2017-ci ilin “İslam Həmrəyliyi İli” elan olunduğunu xatırladan alim sözügedən dəyərlərin Azərbaycanın dövlət siyasətinə çevrildiyini diqqətə çatdırıb.

Sonra nəşrlərin tərcüməçisi Mayıl Əsgərov çıxış edərək “Bibliya tarixi” kitabının birinci hissəsində Əhdi-Ətiq haqqında ümumi məlumatın verildiyini, ikinci hissənin isə Əhdi-Cədidin şərhinə və İsa Məsih ətrafında cərəyan edən hadisə və faktlara yönəldiyini bildirib.

“Pravoslav katixizisi” kitabı barədə danışan M.Əsgərov nəşrdə xristian dininə aid məsələlərlə yanaşı, Müqəddəs Üçlük və Kilsə anlayışları, xaçaçur, məsh olunma və yevxaristiya ayinlərinin mahiyyətinin şərh olunduğunu diqqətə çatdırıb.

Alim Azərbaycan dilində xristianlıq, o cümlədən pravoslavlıqla bağlı məlumatların az olduğunu, nəşrlərin sözügedən boşluğu dolduracağını söyləyib. O, kitabların Azərbaycan-Rusiya dostluq münasibətlərinin daha da inkişafına təkan verəcəyini bildirib.  

Tədbirdə Rusiyanın Azərbaycandakı fövqəladə və səlahiyyətli səfiri Vladimir Doroxin, “İqumen Taisinin Xatirəsi Cəmiyyəti” İctimai Birliyinin rəhbəri, ieromonax Aleksandr Faut, Sankt-Peterburq Dövlət Universitetinin Beynəlxalq əlaqələr üzrə elmi komissiyasının sədri, Dünya siyasəti kafedrasının professoru  Olqa Serpskaya, A.İ.Gertsen adına Rusiya Dövlət Pedaqoji Universitetinin İnsan psixologiyası kafedrasının professoru Marianna Dvoretskaya və digərləri bu cür kitabların Azərbaycanda daha geniş yayılmasının vacibliyini vurğulayıblar.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.