www.science.az
28.09.2017 16:16

Avropa Təhsil Fondu və İrlandiyanın davamlı təhsil və təlim üzrə Agentliyinin nümayəndələri ilə görüş keçirilib

Artıq uzun illərdir ki, AMEA İnformasiya Texnologiyaları İnstitutu Avropa Komissiyasının “Avropa qonşuluq siyasəti” və “Şərq tərəfdaşlığı” proqramları çərçivəsində Avropa Təhsil Fondunun ölkədə əmək bazarının dinamikasının təhlili, insan resurslarının intellektual idarə olunması, kadrlara olan perspektiv tələbatın proqnozlaşdırılması, tələb və təklifin uyğunlaşdırılması üçün yanaşma, metodologiya, vasitə və institusional mexanizmlərin inkişafına yönəlmiş tədqiqat layihələrində iştirak edir.

Əməkdaşlıq çərçivəsində əmək bazarının İT-mütəxəssisləri seqmentində tələb və təklifin tədqiqi, intellektual informasiya texnologiyalarının tətbiqi ilə insan resurslarının səmərəli idarə olunması problemlərinin həlli mexanizmlərinin işlənilməsi, əmək bazarında ixtisaslı kadrlara olan tələb və təklifin uyğunlaşdırılması və proqnozlaşdırılması istiqamətlərində layihələr uğurla həyata keçirilib, Azərbaycanda ixtisaslı işçi qüvvəsinə olan tələb və təklifin proqnozlaşdırılması və uyğunlaşdırılması metodologiyası üzrə yol xəritəsi hazırlanıb.

Avropa İttifaqı Şərq Tərəfdaşlığı ölkələrinin ekspert şəbəkəsinin Azərbaycan üzrə nümayəndəsi, AMEA-nın müxbir üzvü Məsumə Məmmədovanın rəhbərliyi ilə institutun 15 saylı şöbəsində müvafiq istiqamətlər üzrə aparılan tədqiqatların bir sıra elmi-nəzəri və praktiki nəticələri institutun mühüm nailiyyətləri sırasına daxil edilib.

Qeyd olunan istiqamətlərdə əməkdaşlıq əlaqələrinin daha da genişləndirilməsi məqsədilə İnformasiya Texnologiyaları İnstitutunda Avropa Təhsil Fondunun Siyasət və peşə təhsili sistemləri üzrə baş mütəxəssisi Eduarda Kastel Branko və İrlandiyanın davamlı təhsil və təlim üzrə Agentliyinin (SOLAR) Əmək resursları və əmək bazarının tədqiqi üzrə şöbə müdiri Con Mak Qrat ilə görüş keçirilib.

Görüşdə AMEA-nın akademik-katibi, institutun direktoru, akademik Rasim Əliquliyev, M.Məmmədova, institutun elmi-katibi Mədinə Səidova, texnika üzrə fəlsəfə doktoru, dosent Zərifə Cabrayılova iştirak ediblər.

M.Məmmədova görüşün əsas məqsədinin Azərbaycanda Əmək bazarı üzrə Milli Observatoriyanın yaradılması və qonaqların bu istiqamətdə institutun elmi potensialı ilə tanışlığı olduğunu bildirib.

Akademik R.Əliquliyev çıxış edərək institutda aparılan elmi-tədqiqatlar, yaradılmış innovativ şərait haqqında ətraflı məlumat verdi. Alim ölkədə elektron demoqrafiya sisteminin yaradılmasının əhəmiyyətindən danışdı, bu problemlərə diqqət cəlb etməyin vacibliyini vurğulayıb. Ölkəmizdə hazırda bir çox sahələr üzrə reyestr sisteminin mövcud olduğunu qeyd edən R.Əliquliyev elektron dövlət çərçivəsində bu sistemlərin, məlumat bazalarının inteqrasiya olunmasının və demoqrafiya problemlərini öyrənən milli intellektual metaverilənlər sisteminin yaradılmasının önəmini qeyd edib. Bildirib ki, bu sistem əmək problemləri də daxil olmaqla, demoqrafiya sahəsində problemləri aşkar etməyə imkan verəcək.

İnstitutda elektron demoqrafiya problemlərinin araşdırıldığını önə çəkən R.Əliquliyev prof. M.Məmmədovanın rəhbərliyi ilə ölkənin demoqrafiya sisteminin tərkib hissəsi olan elektron-tibb və elektron sağlamlıq demoqrafiyası problemlərinin də tədqiq olunduğunu diqqətə çatdırıb.

Akademik Avropanın bu sahədə fəaliyyət göstərən müvafiq qurumları ilə əlaqələrin qurulması və birgə seminarların keçirilməsinin vacibliyini qeyd edib. 

Alim, həmçinin “Şərq tərəfdaşlığı” çərçivəsində həyata keçirilən Avropa Elm və Təhsil Şəbəkələri Assosiasiyasının (Gigabit European Advanced Network Technology, GEANT) “EapConnect” layihəsindən bəhs edərək ölkəmizi bu layihədə institutun AzScienceNet şəbəkəsinin milli operator statusunda üzvlüyə qəbul olunaraq yeganə səlahiyyətli qurum kimi təmsil etdiyini diqqətə çatdırıb. Bildirib ki, bu şəbəkə dünyanın nüfuzlu beynəlxalq təşkilatları, o cümlədən Avropa Birliyinin müvafiq qurumları ilə sıx əməkdaşlıq əlaqələri quraraq akademiyanın institut və təşkilatları və ölkənin ali təhsil müəssisələrinin dünyanın elm və təhsil şəbəkələrinin təqdim etdiyi texnologiyalardan və xidmətlərdən istifadə etmələrinə şərait yaradır.

Akademik Azərbaycanın əmək bazarında insan resurslarının proqnozlaşdırılması, tələb və təklifin uyğunlaşdırılması sisteminin qurulmasının, ölkədə demoqrafik vəziyyətin monitorinqinin, xüsusilə tibbi seqmentdə fərdi tibbi məlumatlar infrastrukturunun formalaşdırılmasının vacibliyini, e-tibbin formalaşdığı müasir dövrdə belə problemlərin həllinin ölkəninin əsas prioritetləri ilə vəhdət təşkil etdiyini vurğulayıb. Bu baxımdan Əmək bazarı üzrə Milli Observatoriyanın yaradılmasının zəruriliyini qeyd edib.

Qonaqlar bir sıra inkişaf etmiş ölkələrdə, o cümlədən İrlandiyada yaradılmış Milli Observatoriyaların fəaliyyət istiqamətləri haqqında məlumat verdilər və bu qurumun əsas məqsədinin əmək bazarında insan resurslarına olan tələb və təklifinin elmi əsaslandırılmış idarə olunması, proqnozlaşdırılması, onların kəmiyyət və keyfiyyət baxımından ölkədə biliklər iqtisadiyyatının tələblərinə uyğunlaşdırılması, demoqrafik vəziyyətin analizi, proqnozlaşdırılmasını sistematik həyata keçirən və aidiyyatı istiqamətlər üzrə müxtəlif idarəetmə səviyyələri üzrə qərarların qəbuluna intellektual dəstək olan milli informasiya sisteminin yaradılması olduğunu nəzərə çatdırıblar.

Sonda Azərbaycanda əmək bazarının idarə olunması üçün Observatoriyanın yaradılması ətrafında geniş aspektli fikir mübadiləsi aparılıb.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.