AMEA-nın akademik Ə.Quliyev adına Aşqarlar Kimyası İnstitutunda müasir standartlara cavab verən müxtəlif təyinatlı motor, transmissiya, hidravlik və digər sürtkü yağlarının hazırlanması və istehsalının təşkili istiqamətində intensiv elmi-tədqiqat işləri aparılır.
Yaradılmış sürtkü materiallarının istehsalı müasir standartlara uyğun texnoloji qurğulara malik AMEA-nın Təcrübə-Sənaye Zavodunda həyata keçirilir. Hazırda Zavodda istehsal olunan sürtkü materialları respublikanın bir sıra təşkilatları tərəfindən istifadə edilir.
Ötən il 16 adda sürtkü materialının texniki şərtləri işlənilib və Standartlaşdırma, Metrologiya və Patent üzrə Dövlət Komitəsində qeydiyyatdan keçirilib.
Aşqarlar Kimyası İnstitutu tərəfindən xüsusi təyinatlı sürtkü materiallarının yaradılması və istehsalının təşkili ilə bağlı Azərbaycan Respublikası Müdafiə Sənayesi Nazirliyinə birgə fəaliyyət proqramı təklif olunub.
Qeyd edək ki, sürtkü materialları strateji materiallar sırasına daxildir və bu materialların, ilk növbədə, xüsusi təyinatlı sürtkü materiallarının respublikada istehsalının təşkili zəruridir.
© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.