Bu gün tanınmış alim və ictimai xadim, Azərbaycan Respublikası Mədəniyyət və turizm nazirinin müavini, Əməkdar incəsənət xadimi, AMEA-nın müxbir üzvü Sevda Məmmədəliyevanın 70 yaşı tamam olur.
Sevda Məmmədəliyeva 1946-cı il noyabrın 14-də Bakı şəhərində anadan olmuşdur. 1967-ci ildə Bakı Dövlət Universitetini fərqlənmə diplomu ilə bitirmişdir. O, 1993-cü ildə fəlsəfə elmləri doktoru alimlik dərəcəsini, 1997-ci ildə professor elmi adını almışdır. 2001-ci ildə isə AMEA-nın müxbir üzvü seçilmişdir.
1970-1983-cü illərdə Azərbaycan Respublikası Elmlər Akademiyasının elmi-tədqiqat institutlarında əvvəl kiçik elmi işçi, sonradan böyük elmi işçi vəzifələrində çalışmışdır.
S.Məmmədəliyeva 1983-cü ildən Azərbaycan Memarlıq və İnşaat Universitetində pedaqoji fəaliyyətə başlayaraq, ardıcıl olaraq dosent, professor, kafedra müdiri vəzifələrində işləyir.
1996-cı ildə elm, mədəniyyət və təhsil sahəsində xidmətlərinə görə "Bilik" Azərbaycan Maarif Cəmiyyətinin medalı ilə təltif edilmiş, akademik Yusif Məmmədəliyev adına mükafatın laureatı olmuşdur.
1997-ci ildə sosial fəlsəfə üzrə silsilə işlərinə görə o, Beynəlxalq Ekoenergetika Akademiyasının həqiqi üzvü, 1999-cu ildə Rusiya Ekoloji Akademiyasının əcnəbi üzvü, 2000-ci ildə NOOSFERA Beynəlxalq Akademiyasının həqiqi üzvü seçilmişdir.
1999-cu ildə Azərbaycan Respublikasının Prezidenti Heydər Əliyevin fərmanı ilə Sevda Məmmədəliyeva Azərbaycan Respublikası Mədəniyyət nazirinin müavini vəzifəsinə təyin edilmişdir.
Mədəniyyət sahəsində elmi-praktik baza yaratmaq məqsədilə S.Məmmədəliyevanın təşəbbüsü ilə Mədəniyyət Nazirliyində Mədəniyyət siyasəti şöbəsi yaradılmışdır. Bu şöbə beynəlxalq təşkilatlar və elmi institutlarla (Avropa Şurası, UNESKO, Avropa İttifaqı, MDB ölkələrinin mədəni əməkdaşlıq üzrə Şurası, TÜRKSOY) əməkdaşlıq əsasında mədəniyyət sahəsində yeni siyasət işləyib hazırlayan elmi laboratoriya kimi fəaliyyət göstərmişdir.
1999-cu ildən başlayaraq, S.Məmmədəliyevanın bilavasitə iştirakı ilə mədəniyyət siyasəti sahəsində bir sıra milli və beynəlxalq elmi proqramlar işlənib hazırlanmışdır. Onların sırasında "Azərbaycan Mədəniyyətinin Dövlət Strateji İnkişaf Proqramı", "Yoxsulluğun Azaldılması və İqtisadi İnkişaf üzrə Dövlət Proqramı" mühüm yer tutur.
Alim Avropa Şurasının "Stage" regional layihəsinin mühüm mərhələsi olan "Mədəni siyasət üzrə milli məruzənin” müəlliflərindən biridir. O, Avropa Şurasının "Münaqişənin mədəniyyət vasitəsilə aradan qaldırılması" və "Kiyev təşəbbüsü", həmçinin UNESKO-nun "Mədəni çeşidlilik", "GUÖAM ölkələrinin mədəniyyət üzrə observatoriyası" proqramlarının milli koordinatorudur.
2007-ci ildən Avropa Şurasının Mədəniyyət üzrə Rəhbər Komitəsi Bürosunun üzvüdür.
S.Məmmədəliyeva 2005-ci ildə Fransız Elmi Cəmiyyətinin medalına layiq görülmüşdür. 28 yanvar 2016-cı ildə Azərbaycan mədəniyyətinin inkişafında xidmətlərinə görə 3-cü dərəcəli “Vətənə xidmətə görə” ordeni ilə təltif edilmişdir.
Tanınmış elm mücahidini 70 illik yubileyi münasibətilə ürəkdən təbrik edir, ona möhkəm can sağlığı və fəlsəfə elminin tərəqqisi yolunda yeni-yeni yaradıcılıq uğurları arzu edirik!
© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.