www.science.az
01.11.2016 12:38

AMEA-nın 3 mətbu orqanı Azərbaycan Mətbuat Şurasına üzv qəbul olunub

Azərbaycan Milli Elmlər Akademiyasının mətbu orqanları - “Elm-Наука” qəzeti, “Elm və həyat” elmi-populyar jurnalı, “Azərbaycan Milli Elmlər Akademiyasının Xəbərlər məcmuəsi” elmi-ictimai jurnalı Azərbaycan Mətbuat Şurasına üzv qəbul olunub. Bununla bağlı qərar Mətbuat Şurasın İdarə Heyətinin iclasında verilib.

Şuraya üzvlüklə bağlı müraciət AMEA Rəyasət Heyəti aparatının İctimaiyyətlə Əlaqələr və Elmin Populyarlaşdırılması İdarəsi tərəfindən edilib. 

Qeyd edək ki, 1984-cü ildə təsis edilən “Elm” qəzeti ayda iki dəfə olmaqla Azərbaycan və rus dillərində nəşr edilir. Qəzetdə görkəmli elm xadimləri ilə aparılan müsahibələr, müxtəlif tədbirlər və elmi tədqiqatlarla bağlı məqalələr  çap olunur.

1961-ci ildən nəşr edilən “Elm və həyat” elmi-populyar jurnalı isə elmi biliklərin təbliği, Azərbaycan elminin tanıdılması və elmi yeniliklərin oxuculara çatdırılmasında böyük rol oynayır. İldə dörd dəfə dərc olunan 55 illik tarixə malik jurnalda AMEA-nın fəaliyyəti, təbiət, texniki, humanitar və ictimai elmlər sahəsində prioritet istiqamətlərə dair məqalələr, alimlərin əldə etdikləri mühüm elmi nailiyyətlər işıqlandırılır.

2014-cü ildə təsis edilən “Azərbaycan Milli Elmlər Akademiyasının Xəbərlər məcmuəsi” elmi-ictimai jurnalı ildə dörd dəfə nəşr olunur. Jurnal AMEA-da aparılan, öz mahiyyəti ilə ümumictimai əhəmiyyət daşıyan elmi və elmi-təşkilati tədbirlər haqqında geniş oxucu kütləsini tanış edir.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.