www.science.az
09.12.2015 17:08

AMEA-nın magistratura pilləsinə 2016-2017-ci tədris ili üçün qəbul planı təsdiq edilib

Məlumdur ki, AMEA-da ali təhsilin magistratura pilləsinə qəbul 2015-ci ilin fevral ayından etibarən aparılmağa başlanılıb. Akademiyanın magistraturasına 2015-2016-cı tədris ili üçün 9 ixtisas üzrə 19 nəfər qəbul olunub.

Akademiyanın elmi bölmələri və elmi müəssisələrinin təkliflərini nəzərə alaraq AMEA-nın magistraturasına 2016-2017-ci tədris ili üçün qəbul planının layihəsi hazırlanıb. Layihədə 15 ixtisas və 39 ixtisaslaşması üzrə 63 yer nəzərdə tutulub.

AMEA Rəyasət Heyətinin bu gün keçirilən növbəti iclasında qəbul planının layihəsi müzakirə olunaraq bir sıra qərarlar qəbul edilib. Belə ki, Akademiyanın magistraturasına 2016-2017-ci tədris ili üçün qəbul planı təsdiq edilib.

AMEA Rəyasət Heyəti aparatının Elm və təhsil idarəsinə tapşırılıb ki, AMEA-nın magistraturasına 2016-2017-ci tədris ili üçün qəbul planı müəyyən olunmuş qaydada təsdiq olunmaq üçün AR Nazirlər Kabinetinə təqdim edilsin.

Qərarın icrasına nəzarət AMEA-nın vitse-prezidenti, akademik İbrahim Quliyevə həvalə edilib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir