Azərbaycan Milli Elmlər Akademiyası

AMEA-nın akademik-katibi, İnformasiya Texnologiyaları İnstitutunun direktoru, akademik Rasim Əliquliyev ACM-in (Association for Computing Machinery – Hesablama Texnikası Assosiasiyası) əməkdar üzvü seçilib.

Qeyd edək ki, ACM-in üzvlərinin 25 faizini təşkil edən əməkdar üzvlüyə iş təcrübəsi ən azı 10 il olan, yüksək elmi nailiyyətləri ilə seçilən, davamlı Peşəkar Üzvlüyü 5 il təşkil edən üzvlər seçilir.

1947-ci ildə əsası qoyulmuş ACM kompüter mühəndisliyi, kompüter elmləri üzrə mütəxəssisləri birləşdirən, hesablama texnologiyalarının inkişafına dəstək verən, İKT üzrə mütəxəssislərin formalaşmasına yardımçı olan dünyanın ən böyük elm və təhsil cəmiyyəti hesab olunur. ACM cəmiyyət üzvlərinə kollektiv fikir yürütmək, məlumatları paylaşmaq, mühüm problemləri araşdırmaq, idarəçilik kimi qabiliyyətləri aşılayır, cəmiyyət üzvlərinin şəxsi inkişafına, uğurlu karyera qurmasına dəstək olur, professional şəbəkə imkanları təmin etməklə üzvlərinin özünüinkişafına şərait yaradır.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir