Azərbaycan Milli Elmlər Akademiyası

AMEA-nın Naxçıvan Bölməsində görkəmli Azərbaycan yazıçısı, ictimai-siyasi xadim Nəriman Nərimanovun anadan olmasının 150 illiyinə həsr olunmuş onlayn elmi konfrans keçirilib.

Konfransı giriş sözü ilə açan bölmənin sədri, akademik İsmayıl Hacıyev tədbirin Prezident İlham Əliyevin "Nəriman Nərimanovun 150 illik yubileyinin qeyd edilməsi haqqında" 14 fevral 2020-ci il tarixli Sərəncamına əsasən keçirildiyini bildirib. O, yazıçının həyat və yaradıcılıq fəaliyyətindən bəhs edərək bildirib ki, dövrünün görkəmli şəxsiyyətlərindən olan Nəriman Nərimanov hər zaman Azərbaycanın milli mənafeyini yüksək tutub.

İsmayıl Hacıyev diqqətə çatdırıb ki, ümummilli lider Heydər Əliyevin diqqət və qayğısı, böyük səyləri sayəsində Nəriman Nərimanovun 100 və 125 illik yubileyləri qeyd olunub, ulu öndərin təşəbbüsü ilə ədibin Bakıda abidəsi ucaldılıb, ev-muzeyi yaradılıb.

Vurğulanıb ki, Azərbaycan tarixində, ədəbiyyatında özünəməxsus xidmətləri olan görkəmli yazıçının fəaliyyətini əks etdirən çoxsaylı kitab və monoqrafiyalar çap edilib. Ölkə Prezidentinin müvafiq sərəncamına uyğun olaraq Nəriman Nərimanovun ictimai, siyasi fəaliyyətinin təbliği istiqamətində mühüm işlər görülüb.

Tədbirdə bölmənin Tarix, Etnoqrafiya və Arxeologiya İnstitutunun Yeni və ən yeni tarix şöbəsinin aparıcı elmi işçisi Musa Quliyevin “Görkəmli ictimai-siyasi və dövlət xadimi Nəriman Nərimanov”, İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Quliyevin “Nəriman Nərimanov və dil məsələləri”, həmin institutun Ədəbiyyatşünaslıq şöbəsinin müdiri, filologiya üzrə fəlsəfə doktoru, dosent Ramiz Qasımovun “Nəriman Nərimanovun dramaturgiyası” və şöbənin böyük elmi işçisi, filologiya üzrə fəlsəfə doktoru Nərgiz İsmayılovanın “Nəriman Nərimanovun publisistikası” mövzusunda məruzələri dinlənilib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.